Kepler, Johannes: Tertius interveniens. Franckfurt am Mäyn, 1610.

vnd nur zwo positivae qualitates in die composition kommen.

Wirdt sich nun D. Feselius in diesem seinem Büchlin hernacher wider diese speculation ein eintzigs Eynwurffs vernemmen lassen/ soll jhme sein Antwort drüber

werden. Anjetzo sey gnug von diesem Puncten gesagt/ wie viel nemlich D. Feselius vnnd sein Zabarella mir mit dem einigen Wort Liecht eyngeraumet haben.

XXXIV.

Weil ich aber hiermit eine Contrarietet in die Welt eyngeführt/ muß ich einem Eynwurff begegnen. Dann es fragt sich/ weil allein Jupiter das Mittel hält/ ob dann nicht Saturnus vnd Mars/ hiermit für böse boßhafftige Planeten angegeben/ vnd also Gottes Geschöpff verkleinert werde.

Hierauff ist die Antwort D. Feselio gar wol bekandt/ der auch viel Contrarieteten in den Kräuttern findet/ welche jhre wesentliche Eygenschafften seynd/ vnd derwegen vor dem Fall gewest/ Ja noch vor den Sternen am dritten Tag erschaffen worden. Kürtzlich/ diese Contrarieteten gehören zur Zierdt der Welt/ vnd seynd derowegen anderst nicht dann gut/ dann sie alle mit einander Gott dem Schöpffer zu seinem allgemeinen allerheyligsten Jntent dienstlich seynd: vnd werden auch vnter einander selbst eines dem andern gar nicht durch die Banck hinweg böß/ sondern nur mit seiner gewissen Maaß. Der Hundt ist dem Hasen zwar graam/ wann aber der Haaß in seinem Gesträuß bleibt vnd der Hundt zu Hauß/ so gehet einer den andern nichts an. So lang auch der Haaß vmbspringet/ frewet er sich seiner Flucht eben so hoch/ als hoch sich der Hundt seines nachjagens/ vnnd der Mensch deß Weydwercks sich freuwet: biß entlich sein Stündtlin kömpt/ da zwar nach des Hasens Sinnlichkeit der Hvndt deß Hasens grosses Vnglück ist/ so wol als das Alter vnd der zeitliche Todt deß Menschens leiblicher Vntergang vnd Vnglück ist: es kan aber doch dem Haasen kein grössere Ehr widerfahren/ dann wann er vom Hundt erhaschet wird/ vnd dem Jäger auff den Tisch kömpt/ dann darzu ist er gewürdiget von seinem Schöpffer.

Diiijv